Thursday, June 02, 2011

Ania Na Pud Ko Sa Sugbu

Ania na pud ko sa Sugbu! (I'm back in Cebu again).

Pero mubalik ra ko sa Manila unyang kadlawon. Kadali ra ba! Mura man lang ko ug nisimhot sa kwarto, midulog sa akong kapikas, unya biya na sad. Hahay, kapait ining kinabuhia! Taud-taod na man diay akong wala makabalik diri. Enero pa kadto ug karon Hunyo na.

Sa eroplano kagabii, sa iyang pag take-off, gisud-ong nako ang kalapdon sa Metro Manila. Nindot tan-awon ang kahayag sa syudad. Nakita ko sad ang mga highway diin naglinya ang mga suga, ug murag tadlis kun tan-awon sa itaas. Gipiyong na lang nako ang ako mga mata,ug nahimuklod. Nganong napadpad man ko aning dapita nga ang akong kasing-kasing tua man sa sugbo?

Tuig 2008 kadto nga gibalhin ko sa akog kumpanya diri sa Manila. Taas nga posisyon, ug dako sad nga responsibilidad. Kini laging duna pud tay ambisyon mao nga gikab-ot nako ang oportunidad. Niuban pirmiro akong asawa apan nibalik dayun kini tungod sa kalaay ug sa mga oportunidad sa negosyo balik sa Sugbu. Lahi man diay ning mag-inusara ta. Walay mosugat nato inig-uli kundi ang iro sa silingan. Walay panihapon nga naghulat, kundi mga plato nga wala mahugasi sa pipila na ka adlaw. Wala sad kay magakos sa tugnaw nga kagabhion ug mahagkan nga mga tam-is nga ngabil.

Mao sab ang gibati nga kamingaw sa akong asawa. Maayo gani nga naay Sun Cellular kay pwede ra mi mag-istorya sa celphne bisag duha ug tulo ka oras kada adlaw. Kun wala pay Sun, linibo gyud among gasto. Maayo ra pud naa promo ang mga airlines para kun mibisita sya nako, dili na pud dako ang gasto.

Nasayod ko nga dili ra ako ang naa niining sitwasyon. Ang uban, wala gyud sila makaantos ug natintal gyud tungod sa lawasnong panginahanglan. Mao nga mag-ampo gyd mi pirmi sa Kahitas-an nga iya kaming buligan ug tagaan ug kusog sa pagbarog sa husto ug matarong.

Ang akong mga ginikanan, ug bisan akong ugangan, wala gyud makasulay ug panaglagyo sa ilang isig kapikas. Karong mga panahuna, uso na kaayo ni.

Karon, ania na pud ko sa Sugbu mao nga pahimuslan nako ang gamay nga panahon kay unyang kadlawon mubalik na ko sa Manila. Mubalik na sad ko sa mamingaw nga lugar, apan nasayod ko nga sa pipila ka mga bulan, mag-uban na gyud mi sa akong pinanggang asawa ug dili na kami magkalagyo pa.